L’iPhone sco copiader

La soluziun per far ina copia d’in document senza copiader u scanner è l’applicaziun TurboScan. L’applicaziun custa 2.20 francs e tira a niz la camera da l’iPhone. Il document pon ins lura trametter sco PDF u sco maletg via e-mail u lura chargiar via cabel sin il computer.

Per far la foto porscha il program trais variantas. Ina varianta è  da prender ina foto or da l’agen album da fotos. Tar las autras variantas fan ins gist la foto or da l’applicaziun sezza. La varianta simpla dovra ina foto dal document e l’autra varianta pretenda trais fotos dal medem document. Probabel duess quai optimar la qualitad. Amain hai jau gì quest sentiment. Ma i porta uschè pauc ch’i na dovra betg quai.

Nagut per gasettas
Il test fatsch jau cun in artitgel or da la gasetta. Lura pon ins eleger tge part da la foto che mussa l’artitgel. I n’è era betg uschè nausch sch’ins n’ha betg fotografà dal tut grad il maletg. Quai curregia il program in pau. Silsuenter tramet jau l’artitgel sco foto sin mes conto dad e-mail. La surpraisa: il text n’è betg legibel. Jau fatsch anc intginas emprovas. Cun far diever da las opziuns da curreger in pau il maletg daventa il text lura almain legibel.

Duvrabel sut tschertas circumstanzas
Jau na dun anc betg si mes test. Ina gasetta n’è betg gist ina buna funtauna per in far ina copia. Quai gia perquai ch’il palpiri n’è betg alv. Il proxim test fatsch jau perquai cun in text stampà sin in palpiri alv. E quest test funcziuna stupent. Il text e bain legibel.

Il Facit
Ins po dir, che l’applicaziun è duvrabla sut tschertas circumstanzas. Vul dir sch’il text che vegn fotografà è era avant maun en ina buna qualitad ed è scrit sin in palpiri alv. Impurtant è segir era la glisch. Sch’igl è memia stgir, lura na grategi segir betg. Dir stoss jau sa chapescha era ch’jau hai fatg il test cun in iPhone ch’ha ina camera da fotografar cun 2 megapixels. Ina pli auta qualitad da la camera po lura segir era effectuar in meglier resultat.