Verblendung a là Hollywood
In reschissur svedais ha gia filmà ils cudeschs da l’autur Stieg Larsson. Ussa è Hollywood sa fatschentà cun las istorgias da l’autur. L’emprima part raquinta d’in schurnalist che vegn engaschà d’in um ritg. El duai scuvrir tge ch’è capità avant 40 onns cun sia nezza. D'in di a l’auter era quella davent. In misteri che mudregia l’um ritg.
Tadlar la critica da Manuela Morgenthaler...
Per quai vai:
Herriet è dapi 40 onns svanida. Ses aug è anc adina sin la tschertga dad ella. Speranza ha el en il schurnalist Michael. Quel tscherta Herriet ensemen cun agid da la giuvna Lisbeth ch’è in hacker. Quai plascha dentant betg a l’entira famiglia da Herriet. Pertge Michael e Lisbeth scuvran bler, memia bler per inqual.
Quai va bain:
In’istorgia plain tensiun cun surpraisas e buns acturs che mussan ina nova vart dad els.
Quai na va betg bain:
L’entschatta dal film è in zichel lungurusa, i cuzza enfin ch’ins vegn tar l’istorgia principala da Herriet.
La frasa dal film:
Schef da Lisbeth: “ Sie ist einer meiner besten Ermittlerinnen und sie ist in jeder Hinsicht anders.”
Il u LA acturA dal film:
Lisbeth, giugada da Rooney Mara. Ella è enconuschenta ord il film sur da Marc Zuckerberg, là gioga ella l’ex-amia dal fundatur da Facebook. Normalmain è ella blonda, per quai film ha ella taglià ses chavels, laschà colurar els nair, laschà far piercings, fatg dieta, laschà malegià si tatoos e n’astgava betg ir en il sulegl per che la pel saja alva. Ina sfida per Rooney Mara. Tut quellas bragias han rendì. Ella gioga fitg bain, autentic e po liar ils aspectaturs. Sche gie ch’ella è ina persuna ch’ins guntgiss en la vita normala.
