Open Air Tester 2010: victur da l’onn passà defenda la victoria
Ils 17 da zercladur ha la stagiun d’open airs en il Grischun cumenzà. Ussa, dus mais, otg open airs ed in grond manco da sien pli tard savain nus tge open air ch’è il meglier dal Grischun: l'Open Air Chapella.
L’Open Air Tester da battaporta.ch hai dà questa stad per la segunda giada. Sco gia l’onn passà è il team da la redacziun da battaporta sa mess sin via als singuls open airs en il Grischun per prender quels sut la marella. Vegnì testads èn ils suandants criteris: areal e campadi, mangiar e baiver, infrastructura, musica, meds sanitars e la glieud.
- Mirco e ses fans
Era sche nus, Celina Spescha, Mirco Manetsch e Curdin Fliri da la redacziun da battaporta avain valità tut ils open airs ord ina vista neutrala èsi tuttina grev da giuditgar propi objectivamain. Mintgin giuditgescha cun ses agens egls ed ha autras pretensiuns. Per in èsi impurtant d’avair in gronda schelta da tratgas entant ch’auters dovran ina vasta purschida da meds sanitars u in program musical fitg multifar.
Perquai hai quest onn dà ina pitschna midada pertutgant la valitaziun. Auter che l’onn passà ha era il public dastgà valitar ils open airs. Tar il resultat final ves’ins ch’il parairi dal public ha gronda influenza. Durant ils open airs avain nus mintgamai dà ora formulars sin ils quals che mintgin ha pudì dar giu ses parairi. Faschond ina crusch tar ina nota tranter 1 (mender) e 10 (meglier).
Quels che n’avevan betg vis ils formulars als open airs han gì la pussaivladad da valitar ils festival online.
Natiralmain èn quellas persunas ch’han valità ils open airs era vegnì recumpensadas per lur agid. A la fin da la stagiun datti da gudagnar 3 pass d’open air per l’onn 2011 cun ils quals ins ha entrada libra tar mintga open air en il Grischun.
Quels pass han gudagnà: Kerstin Buchli da Versomi, Stefan Camenisch da Duvin e Guido Ineichen da Hellbühl.
Tadlar sco i vegn tratg la sort...
In pign sguard enavos
- OA Lumnezia
- OA Rheinwald
Cun plievgia e fradaglias ha la stagiun d’open air cumenzà a Bogn Ragaz cun il Open Air Quellrock. Uschia ch’il sulegl e temperaturas miaivlas a l’Open Air Trun han fatg bain. Sulegl ed arsas da sulegl han accumpagnà nus a l’Open Air Rheinwald. Bunas notas e blera plievgia hai dà per l’Open Air Stussavgia. Buglia, stivals da gumma, pelerina e plieviga ils quatter substantivs che descrivan l’Open Air Lumnezia entant che l’Open Air Chapella ha giudì buna musica sesend en il pastg sitg, e quai la medema fin d’emna. Cun l’Open Air Hohen Rätien e l’Open Air Malans, bell’aura ed in tschiel stailì ha la stagiun d’Open Airs chattà ina bella fin.
Ils victurs
Era sche l’aura n’era per la gronda part betg la pli bella, n’ha quai betg fatg donn a l’atmosfera.Tar tut ils open airs èsi vegnì ballà, chantà e festivà.
Tuttina ha mintga open air autras attracziuns e purschidas. Il congual mussa, sco gia l’onn passà: pitschen ha plaschì meglier che grond, patgific meglier che las fullas e l’originalitad meglier che commerzi.
- OA Hohen Rätien
Cun 8.6 puncts sin il terz plaz, sa chattan dus victurs da l’onn precedent. L’Open Air Hohen Rätien e Malans n’han betg savì defender la victoria, tuttina èn els anc adina sut ils emprims trais. Cun els sin il terz plaz, quai onn nov, è l’Open Air Rheinwald. In pign exot sut ils emprims plazzai, pertge en cuntrast cun ils auters è quai il sulet grond open air ch’ha cuntanschì in plaz sut ils emprims trais.
- OA Stussavgia
Mo 0,1 punct meglier ed ina pitschna surpraisa è l’Open Air Stussavgia cun 8.7 puncts sin il segund plaz.
- OA Chapella
Igl emprim plaz è dentant cler. Cun 9,1 puncts è l’Open Air Chapella indiscutabel il meglier open air dal Grischun. Cun quai sa il pli vegl open air dal Grischun defender la victoria da l’onn passà. Cun ina buna purschida da musica, infrastructura e gastronomia ha l’open air famigliar da l’Engiadina pudì persvader la giuria ed il public.
I para ch’ins sa cumparegliar ils open airs cun in bun vin.
“Pli vegls ch’el vegn, megliers ch’el è!”. Cordiala gratulaziun.
Tadlar tgi ch’ha gudagnà l’Open Air Tester 2010...
