Finalmain ha Steve Jobs laschà il giat or dal satg. Dapi mais vegn speculà sche Apple saja londervi da crear in nov apparat. In tablet-computer. Mesemna passada èsi lura stà uschè lunsch. L’ iPad è vegnì preschentà.

Sco usità tar Steve Jobs, il schef d’Apple, cumenzà el sia preschentaziun da novs products cun preschentar las cifras da vendita, novas applicaziuns e meglieraziuns da products. Tut quai, ch’interessescha en quai mument nagin. Ils schurnalists spetgan sin insatge tut auter. E lura hai num, sco bleras giadas «one more thing» e Jobs preschenta l’iPad. Il nov apparat saja «vairamain magic e revoluziunari», di Jobs. I saja ina maschaida tranter notebook e telefonin, u ditg auter tranter, MacBook ed iPhone.

L’iPad en cifras
L’iPad ha in visur da ca. 25 centimeters diagonala, quai è pli u main la grondezza d’in figl A5. El paisa rodund 700 grams ed è 1,2 centimeters gross. La battaria tanscha per  lavurar fin 10 uras. El  vegn vendì cun capacitads da la platta ferma da 16 fin 64 gigabyte. Quai almain en ils Stadis Unids. Cura ch’el vegn vendì en l’Europa n’è anc betg enconuschent. Ina tastatura na datti betg. Quella vegn mintgamai visualisada sin il visur ch’è in touchscreen.

Ed i dat gia critica
Malgrà che mo pauca glieud ha insumma vis quest apparat e tegnì el enta maun  datti gia bler da crititgar. Sco era l’iPhone, na sustegn era l’iPad betg flash, uschia ch’ins na po betg guardar videos ed animaziuns en l’internet. Era vegn quintà ch’ins na possia betg avair avert pliras applicaziuns en il medem mument (multitasking). Era quai enconusch’ins da l’iPhone. GPS ed ina Camera n’existan betg. Ed era telefonar na pon ins betg cun l’iPad.

Dovri quai?
Tenor Jobs duai l’iPad duai ins duvrar l’apparat per leger cudeschs e gasettas electronicas, per tadlar musica, leger e-mails ed ir en l’internet e guardar videos u fotos. Mo dovra insatgi insumma in tal apparat? I para che Apple ha dà resposta a questa dumonda e vul sa posiziunar en la nischa dals tablet-computers. Cun ils tablet-computers ha l’industria da computers enfin ussa mai propi fatg grondas fatschentas. Experts èn da l’opiniun che cun l’iPad pudessi quai sa midar. Ma tanscha l’iPad propi? È el propi «magic e revoluziunari»  avunda sco Jobs ha ditg? Nus vegnin a vesair quai. Sin il pli tard cura ch’ins vesa mintg’autra persuna che va enturn cun in computer en la grondezza d’in a A5...