iPhone 4: Ir tard a letg u levar baud
Puspè stat in venderdi en l’ensaina dal mail. En Svizra pon ins cumprar a partir da venderdi il pli nov pop dad Apple, l’iPhone 4. Nus savain tgi che venda cura ils telefonins da cult.
Gia dapi almain in mais pon ins annunziar l’interess per il nov telefonin da la fatschenta Apple e quai tar Swisscom, Orange e Sunrise. L’iPhone 4 duai tenor il schef dad Apple esser anc meglier che ses antecessurs. Gia dapi in temp èsi enconuschent ch’ils telefonins vegnan vendids davent da la fin da fanadur en Svizra.
Carmalar las dunnas cun in ensolver
Sco emprim ha Orange laschà il giat or dal satg. Venderdi èsi uschè lunsch. Orange lantschescha la vendita da l’ iPhone en las fatschentas da Globus e quai gia a partir da las 6 la bun’ura. Il tric londervi è ch’il telefonin vegn vendì mo a dunnas. Il motto “Ladies first” haja dentant gia procurà per reacziuns negativas, ha la pledadra da medias dad Orange ditg envers battaporta.ch. La raschun che Orange lantscha il telefonin en las fatschentas da Globus è ch’i dat en quellas shops dad Orange cun products in pau pli exclusivs e ch’en drizzads oravant tut a la clientella feminina. Wenger di che sa chapescha era ils umens survegnian in iPhone 4. Els stoppian simplamain vegnir en accumpagnament d’ina dunna.
Las stizuns dad Orange lezzas avran lur portas sco usità. Online pon ins empustar tar Orange l’iPhone 4 gia davent da venderdi las 00.01. Persunas ch’èn gia clients dad Orange lez vegnan resguardads sco emprim tar las empustaziuns.
Sunrise po per l’emprima giada vender l’iPhone
Swisscom ha vulì tradir nagut sin dumonda da battaporta.ch. Ella na possia dir actualmain nagut davart l’iPhone 4 ha la pledadra da medias Myriam Ziesack ditg cun vusch rienta a battaporta.ch. Uschia pon ins far quint ch’era la Swisscom ha preparà insatge spezial per lantschar la vendita dal telefonin.
Dapli raquinta il pledader da medias da Sunrise Roger Schaller. El conferma il termin da vendita e di era ch’i vegnia a dar naginas acziuns spezialas per lantschar la vendita. Las stizuns sajan avertas sco usità. Sunrise survegn per l’emprima giada la pussaivladad da vender l’iPhone. Enfin ussa ha Apple betg furnì ses telefonins a Sunrise. 30’000 persunas hajan annunzià lur interess vid questa nova purschida. Schaller valitescha quai sco grond interess vid quella purschida, uschia ch’ins saja led da pudair porscher quels telefonins. Schebain Sunrise ha avunda telefonins per tut quels interessents, n’ha Schaller betg vulì tradir a battaporta.ch.
Betg tradir memia bler
Insumma na vulan las fatschentas da telecommunicaziun betg laschar guardar en lur chartas. Davart la quantitad da telefonins che giaschan en lur magazins n’èsi era betg d’intervegnir insatge da Swiscom ed Orange. Quai è il grond secret che mintga fatschenta pertgira fitg bain.
In auter secret paran ils pretschs dad esser. Enfin ussa ha mo Orange communitgà quels. Il pretsch per in iPhone cun in abunament da 24 mais cumenzan tar 59 francs. Igl è dentant da far quint ch’era las autras fatschentas vegnan a far quai proximamain.
Venderdi vegni probabel puspè ad esser fullas avant las stizuns che vendan telefonins. Ils fans vegnan probabel sco usità gia a spetgà avant che quellas avran lur portas per esser tranter ils emprims ch’èn en possess d’in tal telefon.
