4S enstagl da 5 - il nov iPhone
Apple preschenta l’iPhone 4S sco successur dal iPhone 4. Nagin visur pli grond, nagin nov design. Opticamain guarda il nov telefonin ora sco l'anteriur model. Tuttina datti però diversas innovaziuns, ma mo en l'intern. Pervi da quai el survegnì il num iPhone 4S e betg iPhone 5. Durant mais è vegnì speculà sur dal nov iPhone e segir ch'in u l’auter è forsa in zic dischillus da la preschentaziun. Il nov schef dad Apple, Tim Cook, ha surlaschà als responsabels da mintga partiziun a preschentar ils novs products. Sper l’iPhone nov ha il team anc preschentà novs models dal iPod, il nov sistem operativ iOS5 ed il nov servetsch iCoud.
L'iPhone 4S
iPhone 4S – evoluziun enstagl revoluziun
Sco gia tar l’iPad 2 è era en l'iPhone 4S il processur "Apple A5 Dual-Core". In processur che dublescha pli u main la sveltezza. Ultra da quai porscha il nov chip da la camera ina resoluziun da 8 Megapixel. Quai èn var 60% dapli pixels che tar il chip en l’iPhone 4.
La pli gronda innovaziun è zuppada en la software. In assistent dirigi a vusch cun il num “Siri”. Dumondas sco “Dovri damaun il paraplievgia?” u “Tschertga in bun restaurant chinais” respunda il telefonin cun la prognosa da l’aura e cun ina glista da locals. Siri legia perfin avant ils mails ed SMS. Pel mument funcziunescha’l sin englais, franzos e tudestg.
iOS5 - nagut da nov
Cun il nov sistem operativ per iPhone, iPad e iPod touch l'iOS 5, ch’è vegnì preschentà gia avant in temp, nun ha quai dà novitads pli grondas . Ensemen cun iCloud vegn l'iOS5 lantschà ils 12 october.
L’èra da l'iCloud cumenza
iCloud duess daventar il tscharvè da las datas tranter ils mezs electronics. El sincronisescha musica, fotografias, apps, e-mails, contacts, chalender e documents. Tut quai automatic. Insatge nov è dentant vegnì latiers. Tras iCloud pon ins uss era localisar sin chartas geograficas, nua ch’ils amis èn gist en il mument. Quella purschida ha num “Find my friends”.
