iWebPark - Il parc naziunal sin il iPhone
Per ils visitaders dal parc naziunal Svizzer datti uss sper las broschuras e las cartas topograficas era in App per l’iPhone. Quel dat resposta davart pli u main tut las dumondas che cumparan durant ina excursiun tras il parc.
iWebPark, il program dal parc naziunal Svizzer cuntegna ina massa infurmaziuns davart la flora, fauna e la regiun dal parc. Cun agid dal sistem da GPS respunda l’applicaziun las dumondas gist la nua ch’ellas cumparan. Il guid da viandar digital mussa sin ina carta detagliada da la regiun exact la posiziun dal viandond. Pli che 500 puncts d’infurmaziun cun texts e maletgs san ’ins chattar en il program.
GPS sco agid
Cun la funcziun “In naher Umgebung” vegn ’ins a savair cun in clic tut las observaziuns ch’ins sa far davent dal lieu mumentan. Sia quai infurmaziuns biologicas, geologicas ni era istoricas. Diversas sendas instructivas per uffants e per creschids ed era plirs quizs interactivs procuran per variaziun durant la spassegiada.
Era sur ils cunfins
Ma betg mo il parc naziunal vegn tractà en l’applicaziun. Era sur ils cunfins vegn ’ins a savair diversas chaussas sco per exempel l’istorgia dal uors en la Val Müstair ni uraris da posta per l’entira regiun. Diversas extras cumpletteschan la purschida da l’iWebPark. Vistas panoramicas da divers puncts en il parc, in gieu auditiv per uffants, tips per turas e spassegiadas u propostas per activitads en la regiun.
iWebPark è in’applicaziun che pudess far concurrenza ad in guid dal parc. Il program che custa 9.90 CHF san ’ins era duvrar a chasa. Uschè pon ’ins planisar la proxima spassegiada tras il parc naziunal Svizzer gia oravant.
