Prender a tschains musica
La pussaivladad da prender a tschains musica datti en auters pajais gia dapi pli lung temp. Ussa porscha ina fatschenta da la Germania quai servetsch era per la Svizra. Cun simfy.ch crescha l’atgna collecziun da musica considerablamain.
Davent d’oz datti la plattafurma da musica simfy.ch. Quella pussibilitescha da tadlar gratuitamain passa 6 milliuns titels da musica. Il princip è fitg simpel. Ils utilisaders sa registreschan ed han silsuenter access a la musica. Per dapli confort datti lura anc in abunament. Quel custa 14,50 francs.
Mo al computer èsi gratuit
Tar la varianta gratuita da simfy.ch na pon ins betg telechargiar la musica sin il computer. La musica vegn sco stream a chasa. Quai vul dir ch’ins po mo tadlar la musica mo vid il computer e mo sch’ins è collià cun l’internet. Per finanziar questa purschida vegni era emess reclama. Actualmain n’è quai dentant anc betg il cas. Tenor ils fundaturs da la plattafurma duai quai lura vegnir proximamain. I è da quintar cun ina reclama sin tschintg chanzuns. Gia l’account gratuit dat la pussaivladad da metter ensemen atgnas playlists e da tadlar quellas durant ch’ins navighescha tras la pagina.
Applicaziuns per tadlar offline
Per tadlar la musica senza ina colliaziun cun l’internet datti differentas applicaziuns. Quai per PC u Mac, dentant era per telefonins datti talas applicaziuns. Quellas funcziunan dentant mo cun in abunament. La musica che vegn telechargiada è dentant codada uschia, ch’ins po mo tadlar ella cun las applicaziuns da simfy.ch.
Firmas da discs incasseschan era
La plattafurma simfy.ch ch’i dat gia en la Germania è legala. Ils titels pon vegnir purschids grazia al consentiment da las firmas da discs. Na betg sco ultim, perquai che quellas firmas survegnan daners per metter a disposiziun la musica a questa plattafurma. Las firmas da discs quintan uschia da pudair cumpensar, almain in zichel, las grondas sperditas dals ultims onns tar la vendita da discs cumpacts. Ma betg tuts èn da quest avis, perquai mancan interprets sco Züri West, Polo Hofer, Die Toten Hosen u lura era Die Ärzte. La critica envers simpfy.ch è ch’ins haja ils ultims onns empruvà da far pajar ils utilisaders per telechargiar la musica. Cun questa furma da porscher musica, fetschian ins ussa puspè tut empaglia.
Profitabel è il servetsch anc betg ed ins po sa dumandar tgi ch’è pront da pajar per mais var 15 francs per tadlar musica. Sche simfy.ch ha success, lura pudessi bain spert era dar autras fatschentas che porschan tals servetschs.
